حکومت پاکستان نےفحش مواد رکھنے والی 13000 ویب سائیٹس بلاک کر دیں

ایکسپریس ٹرایبیون پر شائع ہونے والی خبر کے مطابق پارلیمانی سیکریٹری برائے انفارمیشن ٹیکنالوجی نواب لیاقت علی خان نےاعلان کیا ہے کہ حکومت پاکستان کی جانب سے 13000 ویب سائیٹس جن پر فحش اور قابل اعتراض مواد تھا بلاک کر دی گئی ہیں۔

یہاں پر یہ بات قابل ذکر ہے کہ پاکستان ٹیلی کمیونیکیشن اتھارٹی کی جانب سے پاکستان بھر میں انٹرنیٹ کی سہولت فراہم کرنے والی کمپنیوں کو فحش مواد رکھنے والی ویب سائیٹس بلاک کرنے کا حکم جاری کیا گیا تھا لیکن انکی کل تعداد کے بارے میں نہیں بتایا گیا۔

عام تاثر یہ ہے کہ پی ٹی اے کی جانب سے ویب سائیٹس بلاک کرنے کا یہ سلسلہ ہیکرز کے پر زور مطالبہ پر کیا گیا، جب ہیکرز نے پی ٹی اے اور سپریم کورٹ آف پاکستان کی ویب سائیٹس ہیک کر لیں۔

اس حوالے سے اسمبلی میں ایک توجہ طلب نوٹس پیش کیا گیا۔ جس میں حکومت سے پوچھا گیا کہ وہ ان فحش ویب سائیٹس کے بارے میں کیا کر رہی ہے۔ پارلیمانی سیکریٹری کے مطابق حکومت اس تمام صورتحال سے بخوبی واقف ہے اور ایسی ویب سائیٹس کو بلاک کرنے کے لیے اقدامات کیے جارہے ہیں۔

پارلیمانی سیکریٹری نے اس روز بروز فحش ویب سائیٹس کی تعداد میں اضافے کا نوٹس لیتے ہوئے اس کے تدارک کے لیے ایک کمیٹی بنانے کی تجویز پیش کی۔ انکے مطابق حکومت کے پاس ان تمام ویب سائیٹس کو بلاک کرنے کے لیے کوئی واضح نظام موجود نہیں لیکن پھر بھی جیسے ہی انہیں کوئی شکایت ملتی ہے اس پر فوری عمل کیا جاتا ہے۔

انہوں نے انڈیا اور چین کی مثال دی جہاں کثیررقوم خرچ کرکے ویب سائیٹس بلاک کرنے کا سسٹم بنایا گیا ہے جو حکومت مخالف ویب سائیٹس بلاک کرنے کی اہلیت بھی رکھتا ہے۔ مگر پارلیمانی سیکریٹری نے اس بات کی وضاحت کی کہ ایسے نظام کے باوجود تمام فحش ویب سائیٹس کو بلاک کرنا محال ہے۔